Beda Venerabilis: De Temporibus Liber

II: De die

Dies vulgaris est solis praesentia super terras, qui proprie XXIIII horis impletur. Hunc Chaldei et Persae inter duos solis exortus, Aegyptii inter duos occasus, Romani a medio noctis in medium, Umbri et Athenienses a meridie computant ad meridiem. Moyses autem a mane ad manem unum diem appellat; sed domino surgente vespera sabbati luscescebat in primam sabbati ut homo de luce lapsus in tenebras deinceps e tenebris rediret ad lucem.