Beda Venerabilis: De Temporibus Liber

X: De bissexto

Bissextus ex quadrantis ratione per quadriennium conficitur, dum sol ad id signum, ex quo egressus est non in CCCLXV diebus sed quarta diei parte superadiecta revertitur. Verbi gratia, si nunc aequinoctialem caeli locum oriens intraverit in hunc, anno sequente meridie, tertio vespere, quarto medio noctis, quinto rursum in exortu recurrens, Necessario diem praemonet augendum ne si forte non addatur per CCCLXV annos aequinoctium vernale brumali die proveniat. Quem Aegyptii anno suo expleto, id est IIII kal. septembrium, Romani VI kal. martiarum, unde et nomen accepit, interponunt. Breviori autem et vulgari ratione bissextum retardatio generat solis non ad eandem lineam per CCCLXV dies plene redeuntis; quem si, verbi gratia, in aequinoctio vernali, quos iuxta Aegyptios XII kal. aprilium die provenitsurgentem a medio orientis diligenter adnotaveris, hunc anno sequente die videlicet eodem aliquanto inferius oriri, et tertio, quarto, quintoque anno eandem diminutionem in tantum augeri reperies, ut, nisi diem ante superadicias, XI kal. aprilis aequinoctium facturus sol a medio surgat orientis, eandem scilicet tarditatem in caeteris quoque servaturus exortibus.